author Call Us +855 (0)70 761 390 - (0)17 591 289

Compare Listings

តម្លៃ​ដីធ្លី​នៅ​ជុំវិញ​គម្រោង​ព្រ​លាន​យន្ដហោះ​ថ្មី​កើនឡើង​ជាង​200%

  • 0

រាជធានី​ភ្នំពេញ ៖ បន្ទាប់​រាជរដ្ឋាភិបាល​ប្រកាស​ពី​ការ​សាងសង់​ព្រ​លាន​យន្តហោះ​អន្តរ​ជាតិ​ថ្មី ដែល​មាន​ទីតាំង​ស្ថិត​នៅ​ភាគ​ខាងត្បូង​រាជធានី​ភ្នំពេញ បាន​ធ្វើ​ឲ្យ​តម្លៃ​ដីធ្លី​នៅ​តំបន់​នោះ​ដែល​ពី​មុន​មិន​មាន​សកម្មភាព​សោះ ស្ទុះ​ឡើងជា​បន្ដបន្ទាប់ ។ បើ​តាម​មន្ត្រី​អាជ្ញាធរ​មូលដ្ឋាន​បាន​អះអាង​ថា ដី​ធី្ល​ដែល​ស្ថិត​នៅ​ជិត​គម្រោង​មួយ​នេះ​ឡើង​ជាង​២០០% បើ​ធៀប​នឹង​ពេល​មិន​ទាន់​ប្រកាស​ពី​គម្រោង​នេះ​ច្បាស់លាស់ ។

ប្រធាន​មន្ទីរ​រៀបចំ​ដែនដី នគរូបនីយកម្ម សំណង់ និង​សុរិយោដី​ខេត្តកណ្តាល បានឱ្យ​ដឹង​ថា បន្ទាប់​ពី​គម្រោង​សាងសង់​អាកាសយានដ្ឋាន​អន្តរជាតិ​ភ្នំពេញ​ថ្មី​នេះ បាន​ប្រកាស​ពី​ទីតាំង​ធ្វើ​ឲ្យ​ដីធ្លី​ដែល​ពី​មុន​មិនសូវ​មាន​តម្លៃ បាន​ហក់​ឡើង​យ៉ាង​គំហុក ប៉ុន្ដែ​ក្រោយ​មក ក៏​ស្ងាត់​សកម្មភាព​វិញ​បន្ដិច ។

ថ្លែង​តាម​ទូរស័ព្ទ​កាលពី​ថ្ងៃ​ទី​២៣ កុម្ភៈ កន្លង​មក លោក លឹ​ម ចាន់​សូ​ភី ប្រធាន​មន្ទីរ​រៀប​ចំ​ដែនដី នគរូបនីយកម្ម សំណង់ និង​សុរិយោដី បាន​ឲ្យ​ដឹង​ថា ៖« តាម​ដែល​យើង​ពិនិត្យ​មើល ដីធ្លី​នៅ​ជុំវិញ​គម្រោង​អភិវឌ្ឍន៍​ព្រ​លាន​យន្តហោះ​ថ្មី​នេះ តំបន់​ដែល​នៅ​ឆ្ងាយ​ពី​គម្រោង​បន្ដិច ពី​មុន​ថ្លៃ​៤​ដុល្លារ តែ​ឥឡូវ​ឡើង​ដល់​៧​ដុល្លារ​ក្នុង​១​ម៉ែត្រការ៉េ​។ ចំណែក​ដីធ្លី​នៅ​ជាប់​គម្រោង​វិញ តម្លៃ​ដី​ពី​មុន​ចន្លោះ​ពី​៧​ទៅ​១០​ដុល្លារ ឡើង​ដល់​២៥​ទៅ​៣០​ដុល្លារ​ក្នុង​១​ម៉ែត្រការ៉េ ទៅ​តាម​ទំហំ និង​ស្ថានភាព​ឌី ពោល​គឺ​ឡើងថ្លៃ​ជាង​២០០%»​។

យោង​តាម​លិខិត​ទីស្ដីការគណៈរដ្ឋមន្ត្រី​ជម្រាប​ជូន​លោក​រដ្ឋមន្ត្រីក្រសួង​សេដ្ឋកិច្ច និង​ហិរញ្ញវត្ថុ និង​លោក​រដ្ឋលេខាធិការ​នៃ​រដ្ឋលេខាធិការដ្ឋាន​អាកាស​ចរ​ស៊ី​វិល ចុះ​ថ្ងៃ​ទី​២១ ធ្នូ ឆ្នាំ​២០១៧ បាន​បញ្ជាក់​ពី​កម្មវត្ថុ​សុំ​គោលការណ៍​អនុញ្ញាត​បង្កើត​ក្រុមហ៊ុន «​ខេ​ម​បូ​ឌា អ៊ែ​រ​ផត អុ​ិ​ន​វេស​មិន ខូ​អិ​ល​ធី​ឌី (Cambodia Airport Investment Co., Ltd) ជា​ក្រុមហ៊ុន​ដៃគូ​វិនិយោគ​រវាង​វិស័យ​សាធារណៈ និង​ឯកជន​(PPP) ដោយ​យោង​តាម​លិខិត​លេខ​១៣៨ រ​.​ល​.​អ​.​ស ចុះ​ថ្ងៃ​ទី​១៣ ធ្នូ ឆ្នាំ​២០១៧ និង​ចំណារ​ដ៏​ខ្ពង់ខ្ពស់​របស់​សម្ដេច​តេ​ជោ ហ៊ុន សែន នាយក​រដ្ឋមន្ត្រី ចុះ​ថ្ងៃ​ទី​១៤ ធ្នូ ឆ្នាំ​២០១៧ ។ ក្នុង​នោះ​រាជ​រដ្ឋាភិបាល​បាន​ឯកភាព​បង្កើត​ក្រុមហ៊ុន​ខាងលើ ក្នុង​គោលបំណង​អភិវឌ្ឍន៍​សាងសង់​អាកាសយានដ្ឋាន​អន្តរជាតិ​លំដាប់​4F ដែល​មា​នទី​តាំងនៅ​ក្រុង​តា​ខ្មៅ ស្រុក​កណ្ដាល​ស្ទឹង ខេត្តកណ្ដាល នៅ​លើ​ទំហំ​ដី​ចំនួន​២.៦០០​ហិ​កតា ក្រោម​ទុន​វិនិយោគ​សរុប​១.៥០០​លាន​ដុល្លារ ដែល​បាន​មក​ពី​កម្ចី​ធនាគារ​បរទេស​១.១០០​លាន​ដុល្លារ​, កម្ចី​ពី​ភាគទុន OCIC ២៨០​លាន​ដុល្លារ និង​ដើមទុន​ចុះបញ្ជី​១២០​លាន​ដុល្លារ​។ ក្នុង​នោះ​ក្រុមហ៊ុន OCIC មាន​៩០% និង​រដ្ឋលេខាធិការដ្ឋាន​អាកាស​ចរ​ស៊ី​វិល តំណាង​រាជរដ្ឋាភិបាល​កម្ពុជា​មាន​១០% ។

គម្រោង​សាងសង់​ព្រ​លាន​យន្ដហោះ​អន្តរជាតិ​នេះ បើ​តាម​អ្នកនាំពាក្យ​រដ្ឋលេខា​ធិការ​ដ្ឋាន​អាកាស​ចរ​ស៊ី​វិល​បាន​បញ្ជាក់​កន្លង​មក​ថា ស្ថិត​នៅ​តាម​បណ្តោយ​ផ្លូវជាតិ​លេខ​២១ នៅ​តំបន់​វាល​បឹង​កំ​ផ្លោ​ក​ដ៏​ធំ​មួយ (​ហៅ​បឹង​រៀន​) ដែល​ស្ថិត​ក្នុង​រង្វង់​ផ្លូវ​ក្រវាត់ក្រុង​ទី​៣​នា​ពេល​អនាគត បើសិនជា​គិត​ពី​កន្ទុយ​ផ្លូវ​៦០​ម៉ែត្រ គឺ​ទីតាំង​ព្រ​លាន​យន្តហោះ​ថ្មី​នេះ មាន​ចម្ងាយ​ប្រមាណ​៩​គីឡូម៉ែត្រ​ប៉ុណ្ណោះ ។

លោក លឹ​ម ចាន់​សូ​ភី ប្រធាន​មន្ទីរ​រូប​នេះ​បន្ដ​ថា គម្រោង​សាងសង់​ព្រ​លាន​យន្តហោះ​ថ្មី​នេះ បូក​រួម​ទាំង​ការ​សាងសង់​ផ្លូវ​ក្រវាត់ក្រុង​ផង បាន​ធ្វើ​ឲ្យ​តម្លៃ​ដី​ឡើងថ្លៃ​ច្រើន​ដង បើ​ធៀប​នឹង​គ្រា​មិន​ទាន់​មាន​គម្រោង​នេះ​កើតឡើង ។ យ៉ាងនេះ​ក្ដី ក្រោយ​ពី​មាន​សកម្មភាព​ទិញ​-​លក់​ខ្លាំង​បាន​មួយ​រយៈ តំបន់​នេះ​ហាក់​មាន​ភាព​ស្ងប់ស្ងាត់​ជាង​ពេល​មុន​បន្តិច​វិញ។

លោក​បាន​អះអាង​ថា ៖« នៅ​១​ស​ប្តា​ហ៍​ចុង​ក្រោយ​នេះ តាម​ការ​សង្កេត ការ​ទិញ​-​លក់​ដីធ្លី​នៅ​តំបន់​ខាងលើ​ហាក់ដូច​ស្ងាត់​សកម្មភាព ដោយសារ​អាជីវករ​ទិញ​-​លក់​ដី​កំពុង​ស្វែង​រក​មើល​ចំណុច ឬ​ទីតាំង​មាន​សក្តានុពល » ។

នាយក​ក្រុមហ៊ុន Century 21 បាន​មើលឃើញ​ស្រ​ដៀង​គ្នា​ថា ជា​ទូទៅ ដីធ្លី​ឡើងថ្លៃ ឬ​មាន​សកម្មភាព​ទិញ​-​លក់​ច្រើន នៅ​ពេល​គម្រោង​មួយ​លេច​ជា​រូបរាង​ច្បាស់លាស់ ។ ចំណែក​គម្រោង​សាងសង់​ព្រ​លាន​យន្តហោះ​ថ្មី​នេះ បាន​ធ្វើ​ឲ្យ​ប្រជា​កសិករ​ដែល​មាន​ដី​ច្រើន​ហិ​កតា ក្លាយជា​អ្នកមាន​ដោយ​ពុំ​ដឹងខ្លួន ដោយសារ​តម្លៃ​លក់​បាន​ថ្លៃ​ជាង​ពេល​កន្លង​មក ។

លោក វ៉ា វី​រៈ នាយក​ក្រុមហ៊ុន Century 21 បាន​ថ្លែង​ថា ៖« ជា​ទូទៅ តម្លៃ​អចលនទ្រព្យ​ទាំងអស់ នៅ​ពេល​ទើបតែ​ប្រកាស​ពី​គម្រោង​ណាមួយ​ក្នុង​ដំណាក់កាល​ដំបូង នឹង​មាន​អ្នក​សួរនាំ​ចង់​ដឹង​ច្រើន ពេល​នោះ​ហើយ​តម្លៃ​ដី​នឹង​ឡើង ប៉ុន្តែ​បាន​មួយ​រយៈ​ក្រោយមក វា​នឹង​ស្ងាត់ ឬ​អាច​ធ្លាក់​ចុះ​បន្តិច​វិញ ។ ទោះបី​យ៉ាងនេះ​ក្ដី តម្លៃនឹង​ប្រែប្រួល​ម្ដងទៀត នៅ​ពេល​ប្រកាស​ពី​ផែនការមេ និង​មាន​សកម្មភាព​បើក​ការដ្ឋាន​ជាក់លាក់ » ។

លោក​បន្ត​ថា គម្រោង​សាងសង់​ព្រ​លាន​យន្តហោះ​ខ្នាត​អន្តរជាតិ​ថ្មី​មួយ​នេះ ផ្តល់​អត្ថ​ប្រយោជន៍​ដល់​គ្រប់​ភាគី​ពាក់ព័ន្ធ មាន​ទាំង​ក្រុមហ៊ុន​វិនិយោគ ក្រុមហ៊ុន​ផ្តល់​សេវា​អចលន​ទ្រព្យ មេធាវី អ្នក​រត់​ប្លង់ ជា​ពិសេស​ប្រជា​កសិករ​ដែល​មាន​ដីធ្លី​នៅ​ចំ​កន្លែង​ច្រើន​ហិ​កតា នឹង​ក្លាយជា​អ្នកមាន​ដោយ​ពុំ​ដឹងខ្លួន ដោយសារ​តម្លៃ​ដីធ្លី​ឡើងថ្លៃ​ខ្ពស់ ។

បើ​ទោះបី​សព្វ​ថ្ងៃនេះ តម្លៃ​ដីធ្លី​នៅ​ក្បែរ​គម្រោង​នេះ​ឡើងថ្លៃ​ខ្ពស់ តែ​នៅ​ថ្ងៃ​អនាគត បើ​តាម​ប្រធាន​មន្ទីរ​សុរិយោដី​ខេត្តកណ្តាល យល់​ឃើញ​ថា នៅ​ពេល​ព្រ​លាន​យន្តហោះ​ដំណើរការ តម្លៃ​ដី​អាច​នឹង​ថយ​ចុះ​វិញ ដោយសារ​ការ​ធ្វើ​អាជីវកម្ម និង​រស់នៅ​ជុំវិញ​ព្រ​លាន គេ​មិនសូវ​ចង់​រស់​នៅទេ ព្រោះ​ថ្លង់​សំឡេង​យន្តហោះ​។ លោក​បន្ដ​ថា ៖ «ម្យ៉ាង​ទៀត នៅ​ជិត​ព្រ​លាន​មានការ​ហាមឃាត់​មិន​ឱ្យ​សាងសង់​សំណង់​ខ្ពស់​ៗ​ដូចនេះ​នៅ​ពេល​គម្រោង​ព្រ​លាន​យន្តហោះ​ដំណើរការ តម្លៃ​ដី​អាច​នឹង​នៅ​ទ្រឹង​វិញ » ។

គម្រោង​សាងសង់​ព្រ​លាន​យន្តហោះ​ភ្នំពេញ​អន្តរជាតិ​នេះ ត្រូវ​បាន​ចុះហត្ថលេខា​ក្នុង​អំឡុង​ដំណើរ​ទស្សនកិច្ច​របស់​លោក លី ខឺ​ឈាង នាយក​រដ្ឋមន្ត្រី​ចិន ដែល​បាន​មក​ទស្សនកិច្ច​នៅ​កម្ពុជា កាលពី​ថ្ងៃ​ទី​១១ មក​រា កន្លង​មក ៕

Join The Discussion

Mean